Tanjung Emas

TANJUNG EMAS 

Papanmu pinggir samodra

Gedhe labuhmu marang Negara

Baitha-baitha

Saben dina teko lungo

Padha lelayaran

Saka manca Negara

Teka ing nusantara

Para wiyasa mira

Nrajang ombaking samodra

Ora peduli angin gedhe

Ora peduli panasing srengenge

Tanjung Emas

Jenengmu cinatha sejarah

Nganggo mangsi retna

Prasasti saka karang jati

Dadi saksi Labuhmu marang nagari

Kartini

“Kartini”

 

Kartini …
Sapa kang ora kenal panjenengan
Pahlawan kang mbela kaum wanita
Pahlawan kang berjuwang nentang paugeran walanda

Kartini …
Sanajan tinitah dadi priyayi
Duweni trah bangsawan
Kartini mbela emansipasi wanita
Mbela rakyat jelata

Kartini …
Wulan April iki dadi seksi
Lelabuhanmu kang misuwur tumrap bangsa Indonesia
Habis Gelap Terbitlah Terang
Dadi bukti masa perjuwangan
Kutha Jepara dadi papan panggonan ngukir sejarah wanita

Kartini …
Amarga jasamu
Wanita eropa lan wanita pribumi
Dadi duweni hak kang padha
Duweni hak pikantuk pendidikan

Begal

Begal

 

Begal…
Wong liya nyebut brandhal!
Saben dina ngasah gaman nganggo ungkal
Kanggo nodhong njero terminal

Begal…
Pinter golek akal
Sapa wae bakal didadekake tumbal
Begal utege wis mirip kadhal
Yen kecekel dulangen sandhal!

Begal saiki…
Luwih tega nglarani!
Nggawa pitul nembak wong nganti mati!
Nggawe gregetan para pulisi!
Begal dibrantas ana ngendi-endi
Ketemon ngrampas ditembak mati

Begal saiki wis kebangeten
Wus kerep nggawa korban
Donya brana asil rampogan
Haram hukume yen dipangan
Bakal nampa siksaning nraka jahanam

Jaman Palsu

Jaman Palsu

Bapa... 
Kandakna
marang sopo maneh, aku kudu sambat
Nyuntak panggresah lan ndheder
pangarep

Aku mung ngerti saka koran bekas
Njinggleng pakabarab saka tipi
Dhek wingi ana atusan ewu palsu
Eketan ewu palsu..
Puluhan ewu palsu
Oli palsu... solar palsu... bensin ya palsu..
Apa pabrike ya palsu ?
Untu palsu.. sikil palsu.. tangan palsu
Mata palsu jantung palsu
Iki ora ateges ora narimo ing panduming gusti..
Manungso diwajib setyar mbudidaya

Oalah.. kaningaya temen..
sarjana... magister... doktor... dokter.. palsu
Dadi lurah. Ketua partai DPR, bupati, walikota
Pengacara, nganti.. tekan dhosen, jarene
Ijasahe ya palsu 
Esem... guyu... seragam jubah.. lan
Gumantonging palu hakim 
Jebul... ya ulas-ulas lambe 
Aja-aja negara, menteri, DPR, bupati
Walikota, camat, lurah
Nganti tekan rakyate ya palsu.

Apa aku kudu kinter ing jaman sing sarwa palsu
Utawa kudu nyirami pangangenku
Nganggo getihku dewe
Aja-aja getihku ya palsu.. ah palsu.

jaman komputer

JAMAN KOMPUTER

jamane wis sarwa komputer

akeh wong padha keblinger

rodha becakmu tetep munyer

sarapan sega pecel

jamana wis sarwa mal plaza

uripmu panggah nguler kembang

gethuk tela pendhak rina

jamane wis sarwa supermarket

ing desamu pasar pendhak kliwon

dol tinuku nyang-nyangan kaya padudon

golek bati sarepis adus kringet

jamane wis sarwa satelit

pacul arit panggah nggegurit

nggo ngrabuki jagad alit

jamane wis sarwa edan

lanang ilang jalere

wadon ilang wanitane