Korupsi

Korupsi

Abang putih kajunjung duwur ing langit pratiwi
Wujud getih lan balung para pejuang
Apa kowe isih eling?
Cucur kringet luh kang wis kebacut dadi tumbal
Tumbal marang buwana kanggo kemerdekaan

Saiki apa?
Kowe ngapusi, kowe korupsi
Cangkemmu amba kebak arta
Raimu gedhek, ora duwe isin
Dijak rembug malah kepara angler
Rakyatmu kuru, kowe lemu
Rakyatmu mlarat, duitmu sak arat-arat

Sing makmur sapa?
Kowe lan kanca-kancamu
Sing tumindak ala marang rakyatmu
Mula, ayo brantas korupsi
Ayo padha gumregah

Mbangun bangsa Indonesia kang sumringah
Bangsa kang apik ing budi lan tutur
Bangsa kang sejahtera lan makmur

Ibu

Ibu

Tresna asih ibu
Ora ana kang bisa ngganteke
Kesabaran ibu kang kebak wutuh
Ora bisa daklaleke

Do’a ibu kang tulus
tansah ngiringi awakku
pengorbanane kang tanpa wates
ora bisa winales

Ibu . . .
pituturmu bakal dakrungu
tresna asihmu marang aku
ora bakal puput
Pandongaku ibu…
Muga Gusti tansah nyembadani

Pahlawanku

Pahlawanku 

 

Pahlawanku
Wutahing ludirmu
Nyiram ibu pertiwi
Nadyan sang ibu
Kudu muwun sedhih
Karajang-rajang manahe
Karujit-rujit rasa pangrasane

Pahlawanku
Mugya Gusti paring nugraha
Semana gedhene bektimu
Jiwa raga, bandha donya
Tanpa sisa
Amung siji pangajabmu
Merdika

Guru

GURU 
 
 

Guru iku panutaning tingkah laku

Guru patut digugu lan ditiru

Guru ora butuh disubya-subya

Guru amung saderma melu mbangun negara

Lan...

Guru tansah ndedonga

Mugi tan ana kawula

Kang wuta sastra

Mula guru pancen wis trep

Oleh pisung-sung pahlawan tanpa tandha jasa

BOCAH-BOCAH

Dakdeloki saben isuk

Bareng karo ilange bulan ing langit

Bebarengan bocah-bocah kang gemruduk

Mangkat sekolah

Mertandhani Indonesia gemah-ripah

Kebak panganan

dakjumputi

Impen-impen

Ing dhadhane bocah-bocah

Supaya tansah sumringah bungah

Ora nganti kawirangan

Daksawang

Bocah-bocah ora ngerti

Marang ruwete kahanan

Ing padinan

Supaya gegadhan ora punggel

Atine mrepel tugel

Trubus-trubus iku

Supaya ngrembaka

Keturutan kang dadi panjangka mulya

Negeri para Bakul

  NEGERI PARA BAKUL

Negeri para bakul

Dol tinuku datan mligi barang dagangan

Narapidana barter ing pakunjaran

Barter kasus wis dudu wewadi

Yen refan wis sarujuk disepakati

Negeri para bakul

Para politisi uga duwe pasar mligi

Dol tinuku polecy kebijakan

Maja kursi papan kaculikan

Api-api regejekan jebul laku sandhiwara

Negeri para bakul

Konglomerat lan birokrat gamban olah siasat

Dol tinuku kajulingan ngliyer aturan

Layak pajekg dadi bancakan

Negeri para bakul

Dol tinuku jabatan anjrah ing ngendi-endi papan

Bandrol reregan wis cetha nadyan datan kabiwarakake

Yayah kangsen ing papan palanyahan

Negeri para bakul

Kebak tembung lelamisan

Kebohongan kemunafikan kadidenen sega jangan

Nora kawaca bongkot – puncuk

Kabeg-kabeh mubeng seser pindha lingkaran setan.